ИҖТИМАГЫЙ-СӘЯСИ ГОМУМТАТАР ГАЗЕТАСЫ

/№ 90, 25.06.2019/

 

Дөнья мәшәкате онытылды


Кукмара районының Төркәш авылында 50 генә хуҗалык калды. Сабантуй бәйрәмен дә күптәннән күргәннәре юк иде. Быел исә шушы авылда яшәгән Нурзия Шакирова һәм Хәким Гыйниятовларның онык­лары зур бәйрәм – Авыл көне үткәрде.

 

2

– Нурзия апа белән Хәким абыйның балалары бик булдыклы, белемле. Һәркайсы­ның тормышта үз урыны бар. Биш кыз, бер малай алар. Нинди генә үрләргә менсәләр дә, туган якны, кендек каны тамган җирне онытмыйлар. Атна саен кайтып, туган нигез­лә­ренә илткән сукмакны яңар­тып торалар, – ди күршеләре Һәдия Шириева.

 

– Моннан берничә ел элек авылда җыен ясаган идек. Якташларны җыеп, тагын да зуррак бәйрәм ясыйсыбыз килде, – ди Традицион мәдәниятне үстерү республика үзәге хез­мәткәре Фәнзилә Җәүһә­рова.

 

– Быелгы бәйрәмне өч туганыбыз үткәрде. Алар – нәсе­лебездә иң олы оныклар. Без,  әти-әниләре, шуңа сөенә­без: алар үзләрен Төркәшнеке дип саный.

 

Авыл көненә Татарстан­ның халык артисты Зәйнәб Фәр­хетдинова да кайткан иде. Баянчы Ильяс Шәрипов ти­рә-якны моңга күмде. Бәй­рәмне “Болгар” радиосы хез­мәткәре Гөлназ Фәйзрах­манова алып барды.Халыкның мондый бәй­рәмгә сусаганы күренеп тора. Уеннарда катнашырга теләү­челәр чиратка басты.

 

Авыл кешеләре генә түгел, кунак­лар да рәхәтләнеп ял итте. Якташларым өчен бик шатланып утырдым. Бер-берләрен кочаклап күрешә­ләр, сөйлә­шеп сүзләре бетми. Ул арада мәйданга чыгып бииләр, җыр­чыларга кушылып җыр­лыйлар. Чыннан да, дөнья мәшәкатьләрен оныттыра торган бәйрәм булды бу. Килен генә булсам да, бу як халкы гадилеге белән кү­ңелгә якын. Алар да үз итә булса кирәк. Бер генә уеннан да читтә калдырмыйлар. Авыл апайлары белән капчык киеп тә, көянтә-чиләк кү­тәреп тә йөгердек. Хәтта күр­ше авыллар белән ярышып, аркан да тартыштык. Төркәш­леләр сынатмады. Беренчелек гел без­нең якта булды. Иң күңелле уен – күзне бәйләп, чирәмнән бәрәңге җыю булгандыр, мөгаен. Монда яше дә, карты да, бала-чагасы да катнашты. Әле менә башка җирләрдә күзгә чалынмаган яңа уен да тапканнар. Ике кеше бер-берсен мунчада “чабындыра”. Кемнең себерке­сендәге яфраклар тизрәк коела, шул – җиңүче. Бүләкләр дә мулдан әзерләнгән. Оештыручы егет­ләргә шушы авыл кияве Нә­фыйк Мадъяров та матди яр­дәм күрсәт­кән. Авылдашлары Нургали Госманов та бәйрәмгә акчалата үз өле­шен керткән. 

 

Көрәш булмаса да, көч­ле затлар үз көчләрен күр­сәт­теләр. Гер күтәрү­челәр бө­тен­ләй шаккатырды. Кунакка кайткан бер егет аны 310 тапкыр күтәр­де. Кул көрә­шен­дә дә озак тарткалаштылар. Капчык сугыш уены да ир-егет­ләрне бергә җыйды.

 

Бәйрәмдә авылның өлкән яшьтәге кешеләренә бүләк­ләр тараттылар. Нурулла Рә­химул­линга – 94 яшь. Авылда нигезе бар, Кукмарада кызы Ләбибә тәрбиясендә гомер итә.– Колакларым начар ише­тә. Башка бернидән дә зарлана алмыйм. Күзләрем дә күрә, хәтер дә бар. Гомерем буе эш белән яшәгәнгә, озын гомерле булдым. Аннары безнең өебез дә тау артында гына иде. Саф һава сулап, чишмә сулары эчеп үскән буын бит без, – диде ул. 

 

Иң кечкенә сабый – Ис­кән­дәр Хамизовка да бүләк бирделәр.

 

– Кечкенә генә авыл булсак та, без бик бердәм. Авыл кешесе ялындырып тормый, уеннарда катнаша. Тормышта та шулай. Авырлык килсә дә, бергә күтәрәбез, шатлыкларыбыз да уртак, – ди Төркәш мәдәният йорты директоры Нәфыйк Зиннәтов. – Үз күңе­лебезне үзебез күрәбез. Бәй­рәмнәрдә еш кына спектакль­ләр куябыз, концерт оештырабыз. Күрше Нырты авылы белән дус яшибез. Нинди чара уздырсак та, без гел бергә. Төркәшкә генә түгел, якын-тирә авыл халкына бәйрәм яса­ган әлеге гаиләгә чиксез рәхмәт.

 

Кайчандыр бу яклар гөр­ләп торган. Тик колхозлар бет­­кәч, тормыш тукталган. Әле, шөкер, алдагы көн өмет­ле. Узган ел бик озак тик яткан җирләрне “Вахит” хуҗалыгы эшкәртеп чәчә башлагач, авылга ямь керә. Озакламый тагын үзгәрешләр көтелә. Бу якларда Нәкыйп Мадъяров күркә фермасы төзеп ята. Халык эшле дә, ашлы да буласына ышана хәзер.

(“Ватаным Татарстан”,   /№ 90, 26.06.2019/)


Бу язманы шәхси сәхифәгезгә дә урнаштырыгыз:

Архив

Котлыйбыз!

Фотохәбәр

Видеохәбәр