/№ 90, 25.06.2019/

 Дүрт мең тонна сөт бар!

Актанышлылар, район тарихында беренче тапкыр, авыл хуҗалыгы оешмаларында һәм крестьян (фермер) хуҗалыкларында тәүлеклек савым күрсәткечен 200,1 тоннага җиткергән.

– Районыбыз тарихында беренче тапкыр мондый зур күрсәткечләргә ирештек. Бу, узган елның шушы вакыты белән чагыштырганда,  27,9 тоннага, ягъни 16 процентка күбрәк, – дип хәбәр итә район­ның авыл хуҗалыгы һәм азык-төлек идарәсе башлыгы Айдар Мирхәй­дәров.     

Районда сөт җитеш­терү­не арттыруга үзләреннән зур өлеш кертүче оешмалар арасында “Ташкын” җәмгыяте (узган елның шушы вакыты белән чагыштырганда тәү­лек­лек савым  133 процент тәшкил итә), “Әнәк” (115 процент) һәм  “Актаныш” агрофирмалары (111 процент) бар. 

Татарстанның Авыл ху­җалыгы һәм азык-төлек министрлыгы мәгълүматлары буенча, Актаныш – респуб­ликаның тәүлегенә 200 тоннадан артык сөт җитеш­терүче дүртенче районы. 

Бу күрсәткеч буенча Кукмара районы иң алда бара. 17 июньгә булган мәгъ­лү­матлар буенча, анда тәүлек­лек савым 273 тонна тәшкил итә. “Бу, узган елның шушы вакыты белән чагыштырганда, 9 процентка күбрәк”, – ди министр­лык­ның терлекчелек тармакларын үстерү бүлеге баш­лыгы урынбасары Ирек Гыйбадуллин. Икенче урында – Балтач (254,5 тонна), өчен­чедә – Әтнә (219,4 тонна) районнары.

Авыл хуҗалыгы һәм азык-төлек министры Марат Әхмәтов Хөкүмәт йортында утырышта хәбәр иткәнчә, Татарстан авыл хуҗалыгы оешмалары, бер сыердан 17 кг сөт савып алып, беренче тапкыр тәүлегенә 4 мең тонна сөт җитештерә башлаган. Моңа заманча техноло­гия­ләр, тотрыклы сатып алу бәя­ләре (23 сум/кг) һәм аксым югары концентрацияле булган яшел азык җитәрлек дәрәҗәдә ярдәм итә ди министр.

Россия Авыл  хуҗалыгы  министрлыгы  мәгълүмат­ла­ры буенча, Татарстан  товар  сөтен  җитештерү  һәм  сату  буенча   Россия  субъект­лары  арасында иң  алда  бара.  Шулай итеп, 10 июньгә  ведомст­воның оператив бе­леш­мә­ләре буенча, иле­без­нең  авыл хуҗалыгы оеш­малары тарафыннан  тәүлеккә  48,7 мең  тонна  сөт  сатылган,  бу  узган  елның  шушы  вакытына караганда  3,5 процентка күбрәк. Шул ук вакытта,  тәү­леккә иң күп сөт сатуга  иреш­кән төбәк – Татарстан (3,7 мең тонна).  

(“Ватаным Татарстан”,   /№ 90, 26.06.2019/)

Бу язманы шәхси сәхифәгезгә дә урнаштырыгыз:

Фикерләр: 0